മണ്ണിനെയും മനുഷ്യനെയും കുടിയേറ്റ വേദനകളെയും ഹൃദയസ്പർശിയായി അവതരിപ്പിക്കുന്ന ഇന്ത്യൻ സിനിമയിലെ ആദ്യ എഐ ആർട്ട് ഹൗസ് ചിത്രം
വളപ്പൻ ക്രിയേഷൻസിന്റെ ബാനറിൽ ഒരുങ്ങിയ മലയാളത്തിലെ ആദ്യ സമ്പൂർണ എഐ സിനിമയായ ‘വാഗ്ദത്ത ഭൂമി’ തിയേറ്റർ റിലീസിനൊരുങ്ങുന്നു. ചിത്രത്തിന്റെ ട്രെയിലർ ലോഞ്ചും പ്രസ് മീറ്റും കൊച്ചിയിൽ ശ്രദ്ധേയമായി നടന്നു. മലയാള സിനിമയുടെ സാങ്കേതിക ചരിത്രത്തിൽ പുതിയ വഴിത്തിരിവായി കണക്കാക്കപ്പെടുന്ന ഈ ചിത്രം, പൂർണമായും ആർട്ടിഫിഷ്യൽ ഇന്റലിജൻസ് സാങ്കേതിക വിദ്യ ഉപയോഗിച്ച് നിർമ്മിച്ചതെന്ന പ്രത്യേകത കൊണ്ടാണ് സിനിമാപ്രേമികളുടെ ശ്രദ്ധ പിടിച്ചുപറ്റുന്നത്.
നിർമ്മാതാവായ ഷാജു വളപ്പന്റെ നേതൃത്വത്തിൽ ഒരുങ്ങുന്ന ചിത്രത്തിന്റെ രചന, ആനിമേഷൻ, സംവിധാനം എന്നിവ നിർവഹിച്ചിരിക്കുന്നത് സിദ്ദിഖ് പറവൂർ ആണ്. വാലപ്പൻ ക്രിയേഷൻസിന്റെ ബാനറിൽ പുറത്തിറങ്ങുന്ന നാലാമത്തെ ചിത്രമാണിത്. അതേസമയം ഇന്ത്യൻ സിനിമയിലെ ആദ്യ എഐ ആർട്ട് ഹൗസ് സിനിമ എന്ന വിശേഷണവും ‘വാഗ്ദത്ത ഭൂമി’ സ്വന്തമാക്കുകയാണ്.
കേരളത്തിലെ ഒരു മലയോര ഗ്രാമത്തിന്റെ പശ്ചാത്തലത്തിലാണ് സിനിമയുടെ കഥ വികസിക്കുന്നത്. മഴയും മണ്ണും പുഴകളും ചേർന്ന് രൂപപ്പെട്ട ഒരു ജീവിതത്തിന്റെ ആത്മാവാണ് സോളമൻ. തലമുറകളായി കൈമാറി വന്ന കൃഷിഭൂമിയും ഓർമ്മകൾ നിറഞ്ഞ തറവാട് വീടും അദ്ദേഹത്തിന് വെറും സ്വത്തല്ല; പിതാക്കന്മാരുടെ അധ്വാനവും ആത്മബന്ധവുമാണ്. ഭാര്യ ക്ലാരയോടൊപ്പം ശാന്തമായ ജീവിതം നയിക്കുന്ന സോളമന്റെ ലോകത്തേക്ക് അപ്രതീക്ഷിതമായി ഒരു കൊടുങ്കാറ്റുപോലെ മകൻ സാം എത്തിച്ചേരുന്നു.
തൊഴിൽ തേടി കാനഡയിലേക്ക് കുടിയേറിയ സാം, അവിടെ സ്ഥിരതാമസം ഉറപ്പിക്കാനായി സോളമന്റെ പേരിലുള്ള വീടും കൃഷിസ്ഥലവും അദ്ദേഹത്തിന്റെ സമ്മതമില്ലാതെ വിൽപ്പനക്കായി കരാറിൽ ഏർപ്പെടുന്നു. കാനഡയിൽ സ്വന്തം വീട് വാങ്ങണമെന്ന ആഗ്രഹമാണ് സാംയെ ഈ തീരുമാനത്തിലേക്ക് നയിക്കുന്നത്. എന്നാൽ മണ്ണും നാട്ടും വിട്ട് പോകാൻ ഒരിക്കലും ആഗ്രഹിക്കാത്ത സോളമനും മകനും തമ്മിൽ ശക്തമായ ആത്മസംഘർഷം ഉടലെടുക്കുന്നു.
മണ്ണിനോടുള്ള മനുഷ്യന്റെ ആത്മബന്ധവും കുടിയേറ്റത്തിന്റെ കഠിന യാഥാർത്ഥ്യങ്ങളും തമ്മിലുള്ള സംഘർഷമാണ് സിനിമയുടെ പ്രമേയം. യുവതലമുറ നാടുവിട്ട് വിദേശങ്ങളിലേക്ക് ഒഴുകിപ്പോകുമ്പോൾ ഗ്രാമങ്ങൾ പതുക്കെ വയോധികരുടെ താഴ്വരകളായി മാറുന്ന ഇന്നത്തെ സാമൂഹിക അവസ്ഥയെ സിനിമ അതീവ ഹൃദയസ്പർശിയായി അവതരിപ്പിക്കുന്നു.
കുടുംബബന്ധങ്ങളുടെ നിശബ്ദ വേദനകളും തലമുറകളുടെ വ്യത്യസ്ത സ്വപ്നങ്ങളും പ്രകൃതിയോട് ചേർന്ന മനുഷ്യന്റെ ആത്മബന്ധവും ആഴത്തിൽ സ്പർശിക്കുന്ന രീതിയിലാണ് സിനിമയുടെ അവതരണം. സാങ്കേതിക പുതുമയും ശക്തമായ സാമൂഹിക പ്രസക്തിയും ഒരുമിപ്പിക്കുന്ന ചിത്രം മലയാള സിനിമയ്ക്ക് പുതിയ ദിശാബോധം നൽകുമെന്നാണ് സിനിമാ നിരീക്ഷകരുടെ വിലയിരുത്തൽ.
കൊച്ചിയിൽ നടന്ന ട്രെയിലർ ലോഞ്ചിലും പ്രസ് മീറ്റിലും ഷാജു വളപ്പൻ, സിദ്ദിഖ് പറവൂർ, ഡോ. അനശ്വര, ജലീൽ ബാദുഷ, തേക്കിൻകാട് ജോസഫ്, ലിൻസി ഷാജു വളപ്പൻ, ജോസ് മാമ്പുള്ളി, നസീമ അറയ്ക്കൽ എന്നിവർ പങ്കെടുത്തു.
